صوفي آسُورام فقير

آھيان چري ويچاري، دلبر سواءِ تُنھنجي! ڪن کي وھارين ھنج ۾، ڪن کي ڏئين ٿو ڏنجھه ۾، ڪي رنج ۽ ڪي گنج ۾، ھيءَ چال تو نياري. ڪن سان ڪرين ٿو الفت، ڪن تي ڪرين ٿو رحمت، ڪنکي ڏئين ٿو زحمت، ڪن لئي قيام ڪاري. وڌئي ناز سان نهوڙي، دل دردمند ڦوڙي، تو لئي سدائين ووڙي، ھي تَن ڪريو تياري. ’آسو‘ جو تنهنجو بندو، منجھه ڏوھه پاپ گندو، توکي ڪڏھن ملندو، توبهه ڪري ٿو زاري. ورتل: ڪافي 157 (راڳ آسا)،  ويراڳ نامو شاعر: فقير آسُومل صوفي (صوفي آسورام)

اٿي يار جاڳو، سمھڻ آھي اڀاڳو ، ڇڏي لوڪ لاڳو، جپيو رام رام. انهيءَ اوجھرڻ ۾ ، وڃي پئڙا رڻ ۾، جڙ جس جاڳڻ ۾، پورن ڪام ڪام. جنهن کي ننڊ گھيري، مٿي ڦرھي ڦيري، ھڻي ڪنڌ ڪيري، وجھي دام دام. جواني وڃايئي، اڃان مت نه آيئي، جيڪا ڪا سيبائي، گذر گام گام. جنھن کي لاڳ لاڳي، ڀلي سو ئي جاڳي،     ’آسو‘ ڇڏ تياڳي، تڪيو عام عام.   ورتل: شبد 46 (سُر وھاڳڙو)، ويراڳ نامو شاعر: فقير آسُومل صوفي (صوفي آسُورام)

ورتل: ڪافي (81)، ويراڳ نامو شاعر: فقير آسومل صوفي (صوفي آسورام) جنهن پيروي حق جي نه ڪئي، حق کي مڃيؤ تان ڇا ٿيو؟ 1. عاشق چوي لافون ھڻي، مڪرن ڪري واهه واهه وڻي،            سر تان نه سانگو ٿو کڻي، عاشق ٿيو تان ڇا ٿيو؟ 2. قاضي ڪتابن کي پٽي، ماڻھن مٿي مسئلا سٽي،                دم کي دغا کان نامٽي، قاضي ڪهيو تان ڇا ٿيو؟ 3. ساڌو سڏائي پاڻ کي، چنبڙي نشن جي آڻ کي،               هرگز وڃائي نه ڄاڻ کي، ساڌو سڏيو تان ڇا ٿيو؟ 4. جوڳي جٽاؤن لِنگ ٻڌن، ميڙيو ڀڀوتيون بت مَکِنِ،    اندر اُجارو ڪين ڪن، جوڳي جڙيو تان ڇا ٿيو؟ 5. ’آسُو‘ رھي آسُو سدا، ظاھر ته ڄڻ ڏسجي فدا،                منجھه شرڪ کان ٿئي نا جدا، آسُو بنيو تان ڇا ٿيو؟    

غزل (ورتل: ديوانِ آسُو ) شاعر: فقير آسومل صوفي (صوفي آسورام) جي ڪرِين محبوبَ! موڳي سان حساب، لڄ مران! ڪهڙو سگہان ڏيئي جواب؟! ڏوھه ڏِسيو ٿو ڏَڪي ھيڻون ھيون، ھن عمر ۾ ڪو نه ڪيڙم ڪو صواب1. زور، ٻَل سڀ بُت منجہان نڪري ويو، هاڻ ڪونہي سهڻ مون ۾ تاءُ2 تاب3. سَرن4 تُنهنجي سام5 پيئي آھيان، لڄ ڀريا! رک منهنجو اڳيان آءُ آب. تنهنجي گولن جي غلامي ڪئي قبول، ان سندو جھليم اچي ڪنجڪ6 رِڪاب7. تون سچو قدرت جو ساگر بي شمار، آئون اُن قدرت منجھان آھيان حُباب8. سرڳ9 جي هڏ ڪا طلب ناھيم سچ، ڏي ڪو درشن، کولي نيڻن تان نقاب. ٻانھڙو ’آسُو‘ آسائُو10 دَر کڙو، لاھه تنهن سان ھجر11 وارو ھيءُ حجاب. (1) ثواب   (2) سيڪ   (3) تڪليف   (4) پناھہ   (5) اوٽ   (6) گهوڙي جو لغام    (7) گهوڙي جي ٻنهي پاسي لڙڪندڙ لوھي پيرڙيو   (8) ڦوٽو   (9) جنت    (10) سوالي   (11) جدائي

ورتل: ويراڳ نامو: سدا (24)، جناب حضرت شاھہ عبدالقادر جيلانيؒ شاعر: فقير آسُومل صوفي (صوفي آسُورام)   وڏا پير تو در آيس آءٌ سوالي، ڏٺم ڪو نه ويندڙ سوالي ڪو خالي.   محي الدين ميران، تون سرتاج پيران، مدد ڪر فقيران، تون قدرت ڪمالي.   سڀن تي تون اولا، ڪٽين ڀَو ۽ ڀولا، تون محبوب مؤلا، مٺو ذوالجلالي.   ولين جو والي، وڏي نسب عالي، لڳي سواليءَ لالي، ڇا مست و موالي.   مريدن جو آڌر، ڀلو ڀرجھلو ڀر، نه اُن کي ڪو ڊپ ڏر، سدائين سکالي.   ‘آسو’ پنھنجو پازي، ڪري غور غازي، نظر سان نوازين، پنھنجو بند دؤالي.    

ورتل: رسالو آسُومل صوفي (سوال) ٻُڌا حبيبن، توتي ڪيئن قرب ڪيو؟ تون ويري ڪڙم جو، سندو قريبن اڳرو ٿئين ان حال سان، اڳيان عجيبن ‘آسُو’ غريبن، سلي سڻائج ڳالهڙي (جواب) در نه ڇڏيم ڌڻي جو، جي ھيم بک ۽ ڍء لتين لوڌائي ڇڏيائون، ته به نه مڙيس ھڪ جؤ چوڪي ڏنيم چت سان، رکي ادب ۽ ڀؤ خاوند جي حڪم کان، ڪڏھن ڪيم نه ڪؤ سر ڪيم صدقي، توڻي پسي تؤ ٽنگ کڻي توبهه ڪيم، منجهان نياز نؤ اھڙي محبت مؤ، ‘آسُو’ مقرب محب ڪيو    

ورتل: سدا 8 (سُر ڪلياڻ)، ويراڳ نامو  شاعر: فقير آسُومل صوفي (صوفي آسورام)    عنايت الله قلندر شاھه، آھين همراهه هيڻن جو.  دَکن، اُجين چؤڌاري، دليءَ ڪشمير ۾تاري، جتي ڪٿي سنڌ سوڀاري، لڳو نعرو فقيرن جو.  ھندن ۽ مسلمانن مان، ڪٽِي ڪم بيش تو تن مان، ٿيا تو در سڀئي يڪسان، وسيلو بي وسيلن جو. تنهنجا صوفي سدا مرڪن، ٿيو آجا ڪنان ڀرمن، صفا سر جو سي سانگ نه ڪن، لٿو تن غم غمگينن جو.  برھه جي باهه جو ڀڙڪو، لٿو ڦند ڦير جو ڦڙڪو، ذاڪر ذاتيءَ تنهنجي جو ڪڙڪو، ٿيو دارون مريضن جو.  ’آسُوءَ‘ آندي گنهگاري، ستاري ڪر سنديم ساري، پُري ڪج پاڻ پؤواري، آهين ياور يتيمن جو.

In sindhi: Satguru Swami TeunRam Maharaj Jin Jo Jeevan Charitar (Part 1) ستگرو سوامي ٽيئون رام مھاراج جن جو جيون چرتر (ڀاڱو پھريون) In sindhi: Satguru Swami TeunRam Maharaj Jin Jo Jeevan Charitar (Part 2) ستگرو سوامي ٽيئون رام مھاراج جن جو جيون چرتر (ڀاڱو ٻيو) طالبِ دعا آڪاش آسواڻي (تڙپوٽو فقير آسُورام) https://drive.google.com/file/d/1febmmh-DF1tlWC1awC9P9kPxr4zffl8l/view https://drive.google.com/file/d/1ez4gkyWb_1vIZX9yKbLvH2hlStepTaWi/view 03/04/2024